ឯកឧត្ដមបណ្ឌិត ថោង ខុន រដ្ឋមន្ត្រីក្រសួងទេសចរណ៍ ជំរុញឲ្យសហគ្រិនវ័យក្មេង ក្នុងវិស័យទេសចរណ៍កម្ពុជា ត្រូវបង្កើន​សមត្ថភាព ដើម្បីត្រៀមចូលប្រកួតប្រជែង នៅថ្នាក់ពិភពលោក

(ភ្នំពេញ)៖ កាលពីថ្ងៃទី២៣ ខែកុម្ភៈ ឆ្នាំ២០១៧ ឯកឧត្ដមបណ្ឌិត ថោង ខុន រដ្ឋមន្រ្តីក្រសួងទេសចរណ៍ បានដាក់អនុសាសន៍ជំរុញ និងលើកទឹកចិត្តដល់សហគ្រិនវ័យក្មេងក្នុងវិស័យទេសចរណ៍ ដែលជាធនធាន​ថ្មីៗរបស់កម្ពុជា ត្រូវបង្កើន​សមត្ថភាព និងបទពិសោធន៍របស់ខ្លួនឲ្យបានច្បាស់លាស់ទាំងចំណេះដឹង និងចំណេះធ្វើ ដើម្បីត្រៀមលក្ខណៈចូលរួមប្រកួតប្រជែង ជាមួយសហគ្រិនវ័យក្មេងពិភពលោក នៅឆ្នាំ២០១៧ ព្រមទាំងចូលរួម​ផ្សព្វផ្សាយទេសចរណ៍ ក៏ដូចជាកិត្យានុភាព​កម្ពុជា លើឆាកអន្តរជាតិ​ឲ្យកាន់​តែ​ខ្លាំងក្លា​ថែមទៀត​។
ថ្លែងក្នុងសិក្ខាសាលាផ្សព្វផ្សាយស្ដីពី «ការត្រៀមខ្លួនរបស់សហគ្រិនវ័យក្មេង ក្នុងវិស័យទេសចរណ៍កម្ពុជា ដើម្បីចូលរួមប្រកួតប្រជែងសហគ្រិនវ័យក្មេងពិភពលោក ឆ្នាំ២០១៧» នៅទីស្នាក់ការគណៈកម្មាធិការ​ជាតិអូឡាំពិកកម្ពុជា កាលពីថ្ងៃទី២៣ ខែកុម្ភៈ ឆ្នាំ២០១៧នេះ ឯកឧត្ដមរដ្ឋមន្រ្តី បានណែនាំឲ្យសហគ្រិនវ័យក្មេង ដែលទើបដំណើរការអាជីវកម្មរបស់ខ្លួន ចូលរួមប្រកួតប្រជែងសហគ្រិនវ័យក្មេងពិភពលោក ដោយ​ក្រសួង​ទេសចរណ៍ នឹងជួយសម្រួលរៀបចំឯកសារចូលរួមប្រកួត ដែលនឹងប្រកាសជ័យលាភី នាឱកាសទិវា​ទេសចរណ៍​ ពិភពលោក នៅទីក្រុង Lucern ប្រទេសស្វីស នាខែឧសភា ឆ្នាំ២០១៧ ខាងមុខ។
ឯកឧត្ដមរដ្ឋមន្រ្តីបានបញ្ជាក់ថា «ការចូលរួមប្រកួតក្នុងព្រឹត្តិការណ៍ខាងលើ នឹងផ្ដល់ឱកាសឲ្យសហគ្រិនវ័យក្មេងកម្ពុជា ទទួលបាននូវគំនិតថ្មីៗ ក្នុងការអភិវឌ្ឍអាជីវកម្មរបស់ខ្លួន ព្រមទាំងចូលរួមផ្សព្វផ្សាយទេសចរណ៍ ក៏ដូចជា​កិត្យានុភាពកម្ពុជា លើឆាកអន្តរជាតិ ឲ្យកាន់តែខ្លាំងក្លាបន្ថែមទៀត»។
ឯកឧត្ដមរដ្ឋមន្រ្តី ថោង ខុន បានបញ្ជាក់ថា ក្រសួងទេសចរណ៍ នឹងផ្ដល់អ្នកជំនាញបរទេស ជួយបណ្ដុះបណ្ដាល​ដល់សហគ្រិនវ័យក្មេង ក្នុងវិស័យទេសចរណ៍ ដែលមានតម្រូវការផ្នែកបច្ចេកទេស ក្នុងការបង្កើតអាជីវកម្មថ្មី ដោយក្រសួងទេចរណ៍នឹងអញ្ជើញអ្នកជំនាញ ជាង៧០០នាក់ ក្នុងបណ្ដាញរបស់ខ្លួន ដែលភាគច្រើន​ជាអ្នក​ជំនាញចូលនិវត្តន៍ មានបទពិសោធន៍ខ្ពស់ ក្រោមកិច្ចសហការ ជាមួយអង្គការ Swisscontact។
ឯកឧត្ដម ថោង ខុន ក៏បានដាក់អនុសាសន៍ ឲ្យមណ្ឌលអាជីវកម្មទេសចរណ៍ទាំងអស់ ចូលរួម​អប់រំ​បណ្ដុះបណ្ដាលជំនាញ ដល់បុគ្គលិករបស់ខ្លួន ក្នុងទម្រង់ជួយបណ្ដុះបណ្ដាលម្ចាស់អាជីវកម្ម ឬអ្នកគ្រប់គ្រង ឲ្យមានសមត្ថភាពបណ្ដុះបណ្ដាលបន្តដល់បុគ្គលិករបស់ខ្លួន។
សូមរំលឹកផងដែរថា នៅឆ្នាំ២០១៦ កម្ពុជាទទួលបានទេសចរអន្តរជាតិ ជាង៥លាននាក់ ក្នុងកំណើន ៥ភាគរយ។ យោងតាមរបាយការណ៍របស់ ក្រុមប្រឹក្សាធ្វើដំណើរ និងទេសចរណ៍ពិភពលោក (World Travel and Tourism Council: WTTC) ដែលបានចេញផ្សាយនៅឆ្នាំ២០១៦ បង្ហាញថា កម្ពុជាបង្កើតបានការងារដោយផ្ទាល់ និងដោយប្រយោល ប្រមាណ ២.៣លាននាក់ ពីឧស្សាហកម្មធ្វើដំណើរ និងទេសចរណ៍។ ដោយឡែក ការងារដោយផ្ទាល់ពីឧស្សាហកម្មទាំងពីរនេះ មានប្រមាណ ១.២លាននាក់ ស្មើនឹង ១៤ភាគរយ នៃការងារសរុប និងនាំចំណូលចូលសេដ្ឋកិច្ចជាតិ ប្រមាណ ៣,៤០០លានដុល្លារ ស្មើនឹង ១៣.៥ភាគរយ នៃផលិតផលក្នុង​ស្រុកសរុប (GDP)៕